تلہ گنگ میں تین دن سے چکن کی سپلائی اور برائلر چکن شاپس بند

تلہ گنگ(عمران رسول) تلہ گنگ برائلر چکن سپلائرز ایسوسی ایشن  نے انتظامیہ کی طرف سے جاری کردہ غلط سرکاری ریٹ لسٹ، دوکانداروں کی بے جا پکڑ دھکڑ اور ناجائز جرمانوں کیخلاف تلہ گنگ میں تین دن سے چکن کی سپلائی اور برائلر چکن شاپس پر کاروباری سرگرمیاں معطل کرتے ہوئے مکمل شٹر ڈاوَن ہڑتال کر رکھی ہے ،جس کے باعث عوام کو شدید مشکلات کا سامنا کرنا پڑرہا ہے۔ تفصیلات کے مطابق تلہ گنگ سپلائر ایسوسی ایشن کے صدر سلیم بلوچ اور مقامی دوکانداروں کا کہنا تھا کہ 190 یا 200 روپے زندہ مرغی فارم سے لیکر بازار وں میں 180 روپے فی کلو زندہ اور 260 روپے فی کلوگوشت کیسے فروخت کر سکتے ہیں؟ انہوں نے کہا ہے کہ حکومت جس ریٹ پر مرغی کا گوشت بازاروں میں فروخت کروانا چاہتی ہے وہ دوکانداروں کا خریداری ریٹ بھی نہیں بنتا جس کے باعث دوکانداروں اور چکن سپلائی گاڑی والوں کا نقصان ہوتا ہے۔ انہوں نے کہا ہے کہ اگر حکومت کو برائلر گوشت سستا سیل کروانے کا شوق ہے تو وہ مرغی منڈیوں اور فارمرز کے ریٹ کو کنٹرول کرے ،ہمیں مرغی فارمز سے سستی مرغی ملے گی تو بازاروں میں سرکاری نرخ پر سستا گوشت فروخت کرینگے بصورت دیگر ہڑتال کا یہی سلسلہ سرکاری ریٹ ٹھیک ہونے تک جاری رہے گا جس کی تمام تر ذمہ داری حکومت وقت پر عائد ہو گی ۔