جشن شیرازی کی کامیابی ملک دشمنوں کے لئے شکست ہے، ملک بشیر للی

چوآ سیدن شاہ (ملک عظمت حیات سے ) چوآ سیدن شاہ چیئرمین میونسپل کمیٹی ملک بشیر للی نے میڈیا سے گفتگو کرتے ہوئے کہا کہ میلہ اور جشن شیرازی کا انعقاد ہماری بڑی کامیابی ہے اور ملک پاکستان کے دشمنوں اور دہشتگرد عناصر کے لئے شکست ہے ۔ آمدہ سال انشاء اللہ اس سے بہتر انتظام کریں گے اور جشن شیرازی کے انعقاد کو مزید چار چاند لگا کر عوام کے لئے پیش کیا جائے گا ۔

 انہوں نے کہا کہ محترمہ مہوش سلطانہ ایم پی اے،سابقہ چیئرمین حاجی ملک مختار و کونسلرز ملک صوبیدار امیر ، وائس چیئرمین خان ناظم الدین خان ، حاجی ملک وحید ،الحاج ملک صادق اور عملہ میونسپل کمیٹی سمیت علاقہ عمائدین کا شکر گزار ہوں جنہوں نے میلہ کو کامیاب کرانے کے لئے ہمارا بھرپور ساتھ دیا ۔ آئندہ بھی ایسے ایونٹس منعقد ہوتے رہیں گے اس سال بھی سیاست سے بالا تر ہو کر صرف اور صرف عوام کی تفریح کے لئے میلہ کا انعقاد کرایا ہے جو کہ پاکستان کے دشمنوں اور دہشتگردوں کے لئے بھی شکست ہے ۔ میلہ پر عوام نے بڑھ چڑھ کر شرکت کی ۔ 

جشن شیرازی کے حوالے سے عوامی حلقوں کا بھی یہی کہنا ہے کہ ہم سارا سال تفریح کے لئے جشن شیرازی کا انتظار کرتے ہیں اور اس سال بھی میلہ کے ایونٹس کا شدت سے انتظار تھا نیزہ بازی، گھوڑا ڈانس ،موسیقی ،کبڈی ، قوالی اور دیگر ایونٹس دیکھ کر نہایت لطف اندوز ہوئے۔