ترکی کا مقامی سطح پر تیار کردہ اینٹی شپ کروز میزائل کا کامیاب تجربہ

ترکی میں مقامی سطح پر تیار کیے گئے اینٹی شپ کروز میزائل (اے ٹی ایم اے سی اے) کا تجربہ کامیاب رہا۔ کروز میزائل نے کامیابی سے اپنا آخری ٹیسٹ بھی پاس کر لیا جس میں اسے200 کلومیٹر دور مقررہ ہدف کو نشانہ بنانا تھا۔ ترک دفاعی صنعت کے مطابق جلد ہی اس میزائل کو ترک ہتھیاروں کی فہرست میں شامل کر لیا جائے گا۔ اینٹی شپ کروز میزائل کی فوٹیج ترک دفاعی صنعت کے سربراہ اسماعیل دیمِر نے اپنے ٹوئٹر اکاؤنٹ سے شیئر کی جس میں دیکھا جا سکتا ہے کہ میزائل کو ٹیسٹ گراؤنڈ سے لانچ کیا گیا۔ اس میزائل نے 200 کلومیٹر دور مقرر کردہ ہدف کو سمندر میں کامیابی سے نشانہ بنایا۔ اسماعیل دیمِر نے مزید لکھا کہ 200 کلومیٹر کے لمبے فاصلے تک جانے کی صلاحیت رکھنے والا یہ اینٹی شپ کروز میزائل (اے ٹی ایم اے سی اے) ترک فوج کی ہتھیاروں کی فہرست میں شامل ہونے کے لیے بالکل تیار ہے۔ویڈیو میں میزائل کے ڈیزائن کے عمل کو بھی دکھایا گیا ہے کہ کس طرح روکسٹن نے گزشتہ دہائی کے آخر سے اس میزائل پر کام کیا اور اب اس کا تجربہ کامیاب رہا۔ میزائل بنانے والے روکسٹن کے مطابق یہ میزائل سمندر میں گشت کرنے والی کشتیوں، کورویٹ اور فریگیٹس میں بھی نصب کیا جا سکتا ہے اور اس کے کامیابی کے ساتھ ہدف کو نشانہ بنانا بہت آسان ہو گیا ہے۔