قصابوں نے لاغر ، بیمار ، نیم مردہ جانوروں کو ذبح خانہ میں ذبح کرنا شروع کر دیا

چوآ سیدن شاہ( ملک عظمت حیات سے) شہر میں قصابوں نے لاغر ، بیمار ، نیم مردہ جانوروں کو ذبح خانہ میں ذبح کرنا شروع کر دیا ، ڈسٹرکٹ فوڈ اتھارٹی ، دیٹرنری ڈاکٹروں ، تحصیل انتظامیہ کی عدم دلچسپی کے باعث مضر صحت گوشت مہنگے داموں فروخت کیا جانے لگا اسسٹنٹ کمشنر سمیت اعلیٰ حکام خاموش ، ڈی سی چکوال نوٹس لیں ۔

 چوآ سیدن شاہ شہر میں گزشتہ روز نیم مردہ جانور کو ذبح خانہ میں پایا پوچھنے پر معلوم ہوا کہ اس کو ابھی ذبح کیا جائے گا اور مارکیٹ میں اس کا گوشت بیچا جائے گا ۔ قصابوں نے ویٹرنری ڈاکٹر سے ملی بھگت کر کے اور ناقص انتظامات کا فائدہ اٹھاتے ہوئے لاغر ، بیمار ، نیم مردہ جانوروں کو ذبح کرنا وطیرہ بنا لیا ہے ۔جبکہ ویٹرنری ڈاکٹر اور اسسٹنٹ کمشنر سمیت دیگر عملہ دفتروں تک ہی محدود رہ گئے ہیں۔

 قصابوں نے جہاں بیمار جانوروں کا گوشت مہنگے داموں فروخت کرنا شروع کر رکھا ہے وہیں چیک اینڈ بیلنس کا مؤثر نظام نہ ہونے کے باعث بیمار ، نیم مردہ ، اور لاغر جانوروں کو سستے داموں خرید کر ذبح کر کے اپنی دوکان سجا لیتے ہیں یہاں تک کہ مبینہ مردہ جانوروں کا گوشت فروخت کرنے کی اطلاعات بھی موجود ہیں جس کے باعث شہری شدید اضطراب میں مبتلا ہیں ۔

 شہری ،سماجی ، رفاعی ، مذہبی تنظیموں کے عمائدین نے ڈی جی فوڈ اتھارٹی ، کمشنر راولپنڈی ،ڈپٹی کمشنر چکوال اور اسسٹنٹ کمشنر چوآ سیدن شا ہ سے مطالبہ کیا ہے کہ متعلقہ اداروں کے افسران و ملازمین کو روزانہ کی بنیادوں پر قصابوں کو چیک کرنے اور صحت مند گوشت مقررہ نرخوں پر فروخت کرنے کا پابند بنایا جائے ۔