ہم نیب پر واضح کرنا چاہتے ہیں کہ وہ حکومت کے اشاروں پر ناچنا چھوڑ دے، مسلم لیگ ن برطانیہ

چکوال(عبدالغفورمنہاس)مسلم لیگ ن برطانیہ نے مسلم لیگی قائدین میاں حمزہ شہباز شریف اور میاں شہباز شریف کے گھر پر نیب کی طرف سے دھاوا بولنا قابل مذمت قرار دیا ہے اور کہا ہے کہ حکومت کو ایسے اوچھے ہتھکنڈوں سے کچھ حاصل نہ ہوگا، حکومت عوام کی توجہ اصل مسائل سے ہٹانے کے لیے نیب کو استعمال کر رہی ہے ،یہ بات مسلم لیگ ن برطانیہ کے رہنماؤں نے پریس کانفرنس سے خطاب کرتے ہوئے کہی۔

چوہدری عارف اقبال صدر مسلم لیگ ن مڈ لینڈ ،ملک فتح خان جنرل سیکرٹری ،نمبردار غلام مرتضیٰ ،چوہدری اظہر محمود چکرال، راجہ جاوید اقبال ،صاحبزادہ فاروق القادری، حاجی ذوالفقار، راجہ سکندر، مشرف منہاس، راجہ اکمل، صدر نواز شریف فورس اور دیگر کا کہنا تھا کہ نواز شریف اور حمزہ شہباز شریف کی رہائشگاہ پر چھاپہ مارا نیب کا قابل مذمت اقدام ہے، ہم نیب پر واضح کرنا چاہتے ہیں کہ وہ حکومت کے اشاروں پر ناچنا چھوڑ دے۔ اس طرح کے اوچھے ہتھکنڈوں سے حکومت کو کچھ حاصل نہیں ہوگا۔ رہنماؤں کا کہنا تھا کہ حکومت مسلم لیگی کارکنان کے صبر کا امتحان نہ لے۔