چیف منسٹر انویسٹی گیشن ٹیم کی چیئرپرسن مومنہ ناہید چکوال پہنچ گئیں

چکوال(عبدالغفورمنہاس)گورنمنٹ گرلز کالج چکوال کے معاملات کا جائزہ لینے کے لیے چیف منسٹر انویسٹی گیشن ٹیم کی چیئرپرسن مومنہ ناہید چکوال پہنچ گئیں جہاں پر انہوں نے چیئرپرسنز سٹینڈنگ کمیٹی ہائیر ایجوکیشن آسیہ امجد کے ہمراہ کالج پہنچ کر معاملات کا جائزہ لیا،اس موقع پر مومنہ ناہید نے سکول کے اساتذہ سے معلومات حاصل کیں۔انویسٹی گیشن ٹیم کی سربراہ نے کالج میں قواعد و ضوابط کے بغیر بٹھائے جانے والے کلرک کے معاملہ پر تشویش کا اظہار کیا ،دیگر معاملات کا بھی جائزہ لیا اس موقع پر انہوں نے کالج اساتذہ اور سٹاف کو ہدایات جاری کیں کہ کالج کا نظم و ضبط ہر صورت برقرار رکھا جائے۔

انہوں نے اس موقع پر بتایا کہ سابق پرنسپل بشریٰ ماجد کے خلاف اعلیٰ سطح پرانکوائری چل رہی ہے اگر وہ الزامات سے بری الذمہ پائی گئیں تو انہیں واپس تعینات کر دیا جائے گا۔مومنہ ناہید کا کہنا تھا کہ شریف برادران کو عمران فوبیا ہو گیا ہے اور ا ن کی عقل نے کام کرنا چھوڑ دیا ہے۔نیب کا کوئی بھی ادارہ ان کے خلاف کاروائی شروع کرے اور ان کے گھروں پر چھاپے مارے تو وہ بغیر سوچے سمجھے سارا الزام پی ٹی آئی کی حکومت پر داغ دیتے ہیں جو کہ سراسر غلط ہے۔

* قوم ترقی کرتی ہے تو مہنگائی ضرور ہوتی ہے*

چیئرپرسن سٹینڈنگ کمیٹی ایچ ای سی محترمہ آسیہ امجد نے کہا ہے کہ پاکستان تحریک انصاف نے 35سالہ جدوجہد کے بعد اقتدار حاصل کیا اور ملکی دولت لوٹ کر باہر منتقل کرنے والوں پر ہاتھ ڈالا ،نصف صدی سے زائد عرصہ کے بگڑے معاملات درست کرنے کے لیے پی ٹی آئی کی حکومت پوری طرح کوشاں ہے تاہم اس میں کچھ وقت لگے گا،گرلز کالج چکوال کی پرنسپل کو کرپشن کی شکایات پر معطل کر کے انکوائری ٹیم تشکیل دی گئی ہے کالج معاملات چلانے کے لیے میں نے اپنے اختیارات استعمال کرتے ہوئے وائس پرنسپل شکیلہ فاروقی کو پرنسپل کی کرسی پر بٹھایا ۔وہ یہاں چکوال میں پریس کانفرنس سے خطاب کر رہی تھیں، اس موقع پر چیف منسٹر انویسٹی گیشن ٹیم کی چیئرپرسن مومنہ ناہید انصاف یوتھ ونگ کے ضلعی صدر چوہدری احسن زاہد،انچارج سوشل میڈیا حافظ زین العابدین اور دیگر عہدیداران بھی موجود تھے۔ آسیہ امجد کا کہنا تھا کہ گورنمنٹ گرلز کالج چکوال میں معاملات ایک عرصہ سے خراب چلے آ رہے تھے اور کرپشن کی شکایات بھی عام تھیں،جس پر حکومت نے ان کے خلاف ایکشن لیا تاہم بشریٰ ماجد کو معطل کروانے میں ان کا کوئی کردار نہیں، یہ سب حکومتی پالیسیوں کا حصہ ہے، آسیہ امجد کا کہنا تھا کہ سابق پرنسپل بشریٰ ماجد کے خلاف انکوائری چل رہی ہے اگر وہ اکاؤنٹس میں خرد برد کے الزامات سے بری ہو گئیں تو انہیں دوبارہ پرنسپل تعینات کر دیا جائے گا۔ آسیہ امجد کا کہنا تھا کہ پی ٹی آئی کسی کو بھی کرپشن کی اجازت نہیں دے سکتی، یہی وجہ ہے کہ برسراقتدار آنے کے بعد کرپشن کی روک تھام کے لیے ترجیحی بنیادوں پر اقدامات اٹھائے گئے ہیں۔ ایک سوال کے جواب میں آسیہ امجد نے بتایا کہ سابق ایم این اے کی کالج میں محفل میلاد میں شرکت کے موقع پر وہ ضلع سے باہر تھیں اس لیے انہوں نے شرکت نہ کی ۔سابق ایم این اے کی وجہ سے شرکت نہ کرنے کے الزام میں کوئی صداقت نہیں۔آسیہ امجد نے ایک اور سوال کے جواب میں بتایا کہ انہوں نے کالج کا دورہ کیاتھا اور انہیں پتہ چلا کہ پرنسپل بشریٰ ماجد کو معطل کر دیا گیا ہے اور کئی روز گزرنے کے باوجود انہوں نے اپنی معطلی کو چھپائے رکھا اور خود چھٹی پر چلی گئیں جس کی وجہ سے کالج کا نظم و ضبط اور تعلیمی نظام تباہ ہو رہا تھا اور انہوں نے چیئرپرسن سٹیڈنگ کمیٹی ہائیر ایجوکیشن کی حیثیت سے اختیارات استعمال کرتے ہوئے وائس پرنسپل شکیلہ فاروقی کو پرنسپل کی نشست پر بٹھا دیا کیونکہ کالج کے معاملات کسی نہ کسی طرح تو چلانے ہی تھے۔
انہوں نے کہا کہ ڈسٹرکٹ ہیڈ کوارٹر ہسپتال چکوال میں سنگین بے ضابطگیاں سامنے آئی ہیں جبکہ سو ڈاکٹرز کی کمی بھی موجود ہے اور عوام کو صحت کی سہولتیں فراہم کرنے کے لیے ترجیحی بنیادوں پر اقدامات کیے جا رہے ہیں۔ایک اور سوال کے جواب میں آسیہ امجد نے بتایا کہ قوموں کو ترقی کرنے میں مہنگائی کا سامنا تو کرنا پڑتا ہے قوم ترقی کرتی ہے تو مہنگائی ضرور ہوتی ہے۔