سرگودھا روڈ”مقتل گاہ“ کاروپ دھارگئی- تحریک چلانے کا فیصلہ

احتجاجی تحریک کیلئے کمیٹی بنے گی،کمیٹی میں وکلاء، صحافی، سیاسی وسماجی شخصیات کو شامل کیاجائے گا، اس سڑک کودورویہ کرنے کیلئے بھرپور تحریک چلائی جائیگی، تیاریاں شروع چکوال(ساجد بلوچ /سپیشل رپورٹر)چکوال، سرگودھا روڈ دو رویہ کرنے کی تحریک چلانے کافیصلہ کرلیاگیا، ہر سال سینکڑوں قیمتی جانیں ضائع ہونے کے باوجود ارباب اختیار سے نوٹس نہ لینے پر علاقہ ونہار کے عوام نے سخت احتجاج کا فیصلہ کرلیا، وزیراعظم عمران خان، وزیراعلیٰ پنجاب عثمان بزدار اور ضلع کے عوامی نمائندوں کی توجہ بھی اہم مسئلہ کی طرف دلانے کی بھرپور کوشش کی جائے گی۔ تفصیلات کے مطابق چکوال، سرگودھا روڈ عرصہ دراز سے مقتل گاہ بنی ہوئی ہے اور اس سڑک پر ہرسال ہولناک ٹریفک حادثات ہوچکے ہیں جس میں کئی قیمتی جانیں ضائع ہوچکی ہیں اور کئی گھراجڑ چکے ہیں لیکن مختلف ادوار میں آنے والی حکومتوں نے کوئی توجہ نہ دی ہے لیکن اب عوام کے صبر کا پیمانہ لبریز ہوچکاہے یہی وجہ ہے کہ اب علاقہ ونہار سمیت اس روڈ پر موجود مواضعات سے تعلق رکھنے والی عوام نے صدائے احتجاج بلند کرنے کا فیصلہ کیاہے، اور اس حوالہ سے ایک احتجاجی تحریک چلانے کافیصلہ کیاگیاہے جس کے لیے جلد ایک اجلاس بلایا جارہاہے۔ احتجاجی تحریک کے لیے کمیٹی بنائی جارہی ہے جس میں وکلاء، صحافی، سیاسی وسماجی شخصیات کو شامل کیاجائے گااور اس سڑک کودورویہ کرنے کے لیے بھرپور تحریک چلائی جائے گی تاکہ حکومت وقت اور ارباب اختیار اس اہم مسئلہ کی طرف توجہ کریں تاکہ قیمتی جانوں کا ضیاع رک سکے۔